ငါ စာရေးဆရာတစ်ယောက်ဖြစ်သည်။ ငါ ကလောင်တစ်ချောင်းပိုင်သည်။ ငါ့စာဖတ်ပရိသတ်လည်း အရှိသားမဟုတ်လား။ ဒါ့ကြောင့် ငါ ဖန်ဆင်းချင်သလို ဖန်ဆင်းထားသော ဇာတ်ကောင်နှင့် ငါရေးချင်သော ဝတ္ထုတစ်ပုဒ်ကိုရေးမည်ဟု စာရေးဆရာတစ်ယောက်သည် ငါတကော ကောနိုင်သလော။ ကော၍ကော ဖြစ်ပါမည်လော။ ငါ ရှင်ဘုရင်၊ ငါ ဘယ်နှပတ်ပဲလှည့်လှည့်၊ ငါ လှည့်ချင်သလို လှည့်မည်၊ ငါ လှည့်ချင်သလောက်လည်း လှည့်မည်ဟုဆိုကာ ရှင်ဘုရင်များသာ လှည့်ချင်သလိုလှည့်နိုင်သည် မဟုတ်သလော။ သို့ရာတွင် ထိုရှင်ဘုရင်များသည် ဇာတ်သေတ္တာကို ရာဇပလ္လင်လုပ်ထိုင်နေသော ရှင်ဘုရင်များသာ ဖြစ်၏။ တကယ့်ရှင်ဘုရင်များ ဖြစ်ခဲ့ကြသော လွီ၊ ဇာနှင့် ကိုင်ဇာတို့သည် သမိုင်းတွင် အဘယ်ကဲ့သို့ ဇာတ်သိမ်းခဲ့ကြပြီနည်း။