မိုးရာသီသည် ကချင်မြေအဖို့ ကံမကောင်းခြင်းကိုသာ လက်ဆောင်လိုယူလာခဲ့ပါသည်ဆိုလျှင် ဆောင်းရာသီကတော့ သူ့အတွက် အိပ်မက်ဆိုးများသာ ပေးခဲ့ပါသည်ဟု အဆိုင်း ဆိုချင်ပါသည်။ ဘဝတွင် ယောင်၍မျှမစဥ်းစားဖူးသော အိပ်မက်ဆိုးပင်တည်း။ ထိုနှစ်က ဆောင်းရာသီသည် ပုံမှာလိုပင် ဆိုက်ရောက်လာခဲ့သည်။ နှင်းမြူဝေဆိုင်းခြင်းသည်လည်း ပုံမှန်လို။ ကြမ်းရှအေးစိမ့်သောလေများ အိမ်ငယ်လေးများထဲသို့ တိုးဝှေ့တိုက်ခတ်သည်မှာလည်း ပုံမှန်လို။ အရာရာပုံမှန်လို။ သို့သော် ပုံမှန်မဟုတ်ဟု ဆိုစရာရှိသည်များကိုလည်း ကြုံလာရပေသည်။ စစ်သည် ခြောက်သယောင်းထသည့်တော၌ လောင်အပ်သော မီးနှယ် တစစကျယ်ပြန့်လာပြီ။