သူ၏ နေရပ်လိပ်စာကို မိမိရှိသမျှ စည်းစိမ်ကို ပုံအော၍ ဝယ်လို့ရလျှင် ဝယ်ချင်ပါသည်။ သူ ဘယ်လို မိုးကောင်းကင်အောက်မှာ ရှိနေပါသနည်း။ သူ တစ်နေရာရာမှာ ပျော်ရွှင်ကျန်းမာနေကြောင်း သူမ မြင်တွေ့ချင်သည်။ သူ ပြန်လာချင်လည်းလာမည်။ မလာဘဲလည်း နေနိုင်သည်။ သူ့မဟုတ် သူ..ဤကမ္ဘာမြေပေါ်တွင် ရှိချင်မှလည်း ရှိတော့မည်။ သူနှင့် ပတ်သက်သမျှ ဘာမဆို ဖြစ်နိုင်ပါသည်။ ဧည့်ခန်းနံရံများ၊ တိုင်များပေါ်တွင် ရှုပ်ပွပြည့်နှက်နေသော နာရီအမျိုးမျိုးကို ငေးမောနေမိမလားဟု စူးစမ်းလေ့လာကြည့်သည်။ နာရီအားလုံး ငြိမ်သက်နေသည်။ တစ်ချို့က ပင့်ကူမျှင်များ ရစ်တွယ်နေသည်။ တိုင်ကပ်နာရီများ၏ သစ်သားအိမ်နံရံတို့တွင် ဖုန်တက်နေသည်။ သည်နာရီတွေဟာ ဘာများ အံသြစရာ ရှိလို့လဲကွယ်။ သူမသည် အားလျော့ စိတ်ပျက်စွာ မျက်နှာလွှဲလိုက်၏။