"မေးခွန်းကောင်းလျှင် ကောင်းသလောက် အပြောကောင်းတတ်ကြသည်။ ဖတ်၍ကောင်းသည်။ စာရေးဆရာ၏ဘဝကို ပို၍မြင်ကြသည်။ သို့သော် မေးမြန်းသူတို့က မေးမြန်းဆွေးနွေးရာတွင် မိမိတို့ စိတ်ဝင်စားသောကိစ္စများ ပါတတ်ကြသည်။ ပုဂ္ဂိုလ်ရေးပါသည်ဟုဆိုရာတွင် အချို့သော တွေ့ဆုံမေးမြန်းခန်းတွင် ပုဂ္ဂိုလ်တို့၏ ရည်းစားရေးရာများ ပါတတ်သည်။ ယင်းသည် စာဖတ်သူတို့အတွက် စိတ်ဝင်စားစရာဖြစ်သော်လည်း စာပေသမားများအတွက်ကား အနုပညာများအကြောင်း မပါသဖြင့် စိတ်ဝင်စားချင်မှ စိတ်ဝင်စားမည်။ အနုပညာနှင့်ပတ်သက်သော အကြောင်းအရာကို မေးမြန်းသဖြင့် စာပေသမားတို့က ဖြေကြားရာတွင် ကျွန်တော်က စိတ်ဝင်စားသည်။ အထူးသဖြင့် အချို့စာရေးဆရာတို့သည် တွေ့ဆုံမေးမြန်းခန်းတွင်မပါသော အကြောင်းအရာများကို ပို၍စိတ်ဝင်စားသည်မှာ သဘာဝပင်ဖြစ်သည်။"
