မြန်မာ့သမိုင်းတစ်လျှောက်တွင် ရဲစွမ်းသတ္တိနှင့်ပြည့်စုံသော သူရဲကောင်းများ၊ မင်းကျင့်တရားနှင့်ညီညွတ်သော ဘုရင်ဧကရာဇ်များ၊ ဉာဏ်ပညာကြီးမားသော မှူးမတ်များ၊ သစ္စာတရားကို အသက်တမျှတန်ဖိုးထားသော မင်းမှုထမ်းများ၊ မတရားမှုကိုဆန့်ကျင်သော၊ ကျေးဇူးတရားကိုစောင့်သိသော၊ တာဝန်ကျေပွန်သော စသည်ဖြင့် လေးစားအားကျဖွယ်၊ စံပြုအတုယူဖွယ် ပုဂ္ဂိုလ်ထူးများ အများအပြားရှိပါသည်။ ဤစာအုပ်တွင် ထိုသို့သော ပုဂ္ဂိုလ်များအနက်မှ အချို့၏အကြောင်းကို ရွေးထုတ်စုစည်းကာ ကလေးများ စံနမူနာထား ကြိုးစားနိုင်ကြစေရန် ဖော်ပြထားသည်။