အကြောက်တရားကိုအခြေခံပြီး ကလေးတွေကိုထိန်းချုပ်တာမျိုးဟာ ဘာနဲ့တူသလဲဆိုရင် တွန်းအားကောင်းတဲ့ စပရင်ခွေကို ငြိမ်နေအောင် အတင်းဖိထားတာနဲ့ တူပါတယ်။ ဖိထားနိုင်တဲ့ အချိန်မှာတော့ ပိနေပါမယ်။ ဒါတောင် အောက်ဘက်က ပြန်တွန်းကန်အားရှိနေသလို စိတ်ထဲကတော့ မကျေမနပ်ဖြစ်နေနိုင်ပါတယ်။ ဖိထားတာ တစ်ချက်ကလေး လွတ်သွားတာနဲ့တစ်ပြိုင်နက် ရုန်းကန်ထွက်သွားမှာ ဖြစ်ပါတယ်။ ကလေးကို ကြောက်အောင် ဖိထားရသူအတွက်လည်း တကယ်တော့ ခက်ခဲပါတယ်။ အချိန်တိုင်း ဖိထားရတဲ့အတွက် သူ့မှာလည်း တင်းကျပ်မှုရှိတာပါပဲ။ ဖိနှိပ်ခြောက်လှန့်ခံထားရတဲ့ ကလေးတွေအတွက်ကတော့ စိတ်ကျဥ်းကျပ်မှု ပိုပြီးခံစားရတာပေါ့။