Annotation
အားလုံးခြုံငုံသုံးသပ်ရလျှင် ဆရာဦးညွန့်သိန်း၏ ဘဝနှစ်ဘဝလုံးမှာပင် ဆေးခန်း၊ ဆေးရုံ၊ ဆေးကျောင်း၊ ဆေးတက္ကသိုလ်များ ဘောင်အတွင်းမှာသာ လူနာများ၊ ဆေးကျောင်းသားများ၊ ဆရာဝန်များ၊ ပါမေက္ခများ၊ သူနာပြုများအကြောင်းသာလျှင် ရေးသားထားသည်မဟုတ်ပါ။ လူနာနှင့် လူနာရှင်၊ လူနာစောင့်၊ ဆေးရုံဝန်ထမ်း အကူအညီနှင့် ပတ်ဝန်းကျင်ကိုလည်းကောင်း၊ မိဘ၊ ဆွေမျိုးညာတကာ၊ အသိမိတ်ဆွေ၊ ရပ်မိရပ်ဖ၊ အိမ်နားနီးချင်းနှင့် ပတ်ဝန်းကျင်အကြောင်းနှင့် စာရေးသူ၏နှစ်ဘဝ ထိတွေ့ဖြစ်ပျက် လှုပ်ရှားခဲ့ပုံများကိုပါ အထိုက်အလျောက် စုံလင်စွာထည့်သွင်းရေးသားထားပါသည်။ အမှန်မှာ စာရေးသူကြုံတွေ့ခဲ့ရသော နှစ်ဘဝကို ခြုံငုံပြီး ပိုမိုကျယ်ပြန့်သော လူ့ဘဝပတ်ဝန်းကျင်နှင့် ထိတွေ့ဖြစ်ပျက်ခဲ့သည်များကို ရှုမြင်သုံးသပ်ပြီး တင်ပြထားခြင်းဖြစ်ပါသည်။