ဒီနေ့ခေတ် သားသားမီးမီးတွေတိုင်းက နည်းပညာပစ္စည်းတွေနဲ့ ရင်းနှီးကျွမ်းဝင်လွန်းလာကြပါတယ်။ စမတ်ဖုန်းတွေ၊ တက်ဘလက်နဲ့ အင်တနာက်တွေသာမရှိရင် သူတို့ရဲ့ဘဝက ဘယ်လိုဖြစ်မလဲ မတွေးရဲစရာပါ။ တကယ်တော့ ခေတ်မီဒစ်ဂျစ်တယ်ပစ္စည်းတွေက ဘယ်လောက်ပဲ စိတ်လက်အပန်းပြေစနိုင်တယ်ဆိုဆို၊ ပညာရေးအတွက် တစ်စိတ်တစ်ပိုင်း အထောက်အကူပြုနိုင်တယ်ပဲပြောပြော အဲဒီ Screen က ထုတ်လွှတ်လိုက်တဲ့ အလင်းတန်းတွေဟာ မျက်လုံးကို ထိခိုက်ရုံတင်မကဘဲ ဦးနှောက်ကို အိပ်မပျော်အောင်လှုံ့ဆော်ပြီး အိပ်ချိန်ထိခိုက်တဲ့ ပြဿနာတွေပါ ဖြစ်ပါတယ်။ စမတ်ဖုန်း၊ ရုပ်မြင်သံကြား၊ ရုပ်ရှင်၊ ဂီတနဲ့ ဗီဒီယိုတွေကို တစ်နေ့မှာ နှစ်နာရီအထက်ကြည့်ရှုတဲ့ မူလတန်းနဲ့ အထက်တန်းကလေးငယ်လေးတွေဟာ ပတ်ဝန်းကျင်မှာလည်း စိတ်ပိုင်းဆိုင်ရာနဲ့ လူမှုဆက်ဆံရေးဆိုင်ပြဿနာတွေရှိတယ်လို့ စစ်တမ်းတစ်ခုမှာ ဖော်ပြထားပါတယ်။