ဓမ္မဒူတ ဘာသာရေးစာစောင်တွင် ရေးသားသောစာများ ဖြစ်သော်လည်း မကျေနပ်မှု ခံစားချက်များက လွှမ်းမိုးနေပါသည်။ ကိုယ့်မိသားစုတစ်စုတည်းအတွက် အေးချမ်းစွာ နေနိုင်သော်လည်း အစစအရာရာ အောက်ကျနောက်ကျဖြစ်နေသော တိုင်းပြည်အတွက် စိုးရိမ်ပူပန်အားမရမှုများက နေ့စဉ်လိုလို ခံစားနေရပါသည်။ ၂၀၁၅ ခုနှစ် အာဏာလုပွဲနှင့်အတူ နယ်ပယ်အသီးသီးက ပဲ့တင်လာသော အသံများ က မိမိ၏ စိတ်မျက်စိ၊ စိတ်နားတွင် ရိုက်ခတ်လာသည်။ ပြည်သူတို့နှင့် ထပ်တူထပ်မျှ ခံစားရေးသားရသော စာတို့တွင် မရိုးသားသူတို့အပေါ် ဒေါသသံကဲနေမည်မှာ သေချာပါသည်။ သို့သော် မတတ်နိုင်။ စိတ်ထဲကလာသည့်အတိုင်း ရေးသားမိသဖြင့် တစ်စုံတစ်ရာလည်း တွေးမကြောက်တော့။ ထို့ကြောင့် စာအုပ်ခေါင်းစဉ်ကို ကျိန်စာနှင့် အခြားရသစာတမ်းများဟု ရဲရဲတပ်လိုက်ပါသည်။