Annotation
လူမျိုးတိုင်း၊ ဒေသတိုင်း၌ မိရိုးဖလာ လူမှုဓလေ့ထုံးစံများ ရှိပါသည်။ အဆိုပါ ဓလေ့ထုံးစံများမှာ တူညီသည်များရှိသကဲ့သို့၊ "တစ်ကျောင်း တစ်ဂါထာ၊ တစ်ရွာ တစ်ပုဒ်ဆန်း" ဆိုသလို ကွဲပြားကြသည်များလည်း ရှိသည်။ အချို့သော ဓလေ့ထုံးစံများမှာ ခေတ်ကာလပြောင်းလဲလာသည်နှင့်အမျှ ပြောင်းလဲသွားသည်များ ရှိသလို၊ မှေးမှိန်ပျောက်ကွယ်သွားသည်များလည်း ရှိသည်။ မည်သို့ပင်ဆိုစေ အဆိုပါ ဓလေ့ထုံးစံများသည် သူတို့၏ ဘဝဖြတ်သန်းမှု၊ အတွေ့အကြုံ၊ အတွေးအခေါ်၊ ယုံကြည်မှုတို့ကို ထင်ဟပ်လျှက်ရှိပါသည်။ လူမှုဓလေ့ထုံးစံများကို လေ့လာခြင်းဖြင့် လူမျိုးတစ်စု၊ ဒေသတစ်ခု၏ ယဥ်ကျေးမှု သမိုင်းကြောင်းကို ခြေရာကောက် နားလည်သဘောပေါက်နိုင်ပါလိမ့်မည်။
