ကိုယ့်ကိုယ်ကို တကယ်လေးစားတဲ့သူဟာ ကိုယ့်ကြောင့် သူတစ်ပါးဒုက္ခရောက်အောင် မလုပ်ဘူး။ သူများကို ဒုက္ခရောက်အောင် ဂုဏ်သိက္ခာကျအောင် လုပ်ချင်ပြောချင်နေတဲ့အခါ ကိုယ့်စိတ်ကို သေသေချာချာကြည့်ပါ။ အဲဒီလိုစိတ်မျိုးဖြစ်နေတဲ့ ကိုယ့်ကိုယ်ကို လေးစားနိုင်သလား။ မကျေနပ်မှုအစိုင်အခဲတွေ များနေတဲ့သူဟာ အသိဉာဏ်လမ်းပိတ်နေတယ်။ မကျေနပ်မှု နည်းသွားတဲ့အခါ အသိဉာဏ်လမ်းပွင့်လာတယ်။ တစ်ကိုယ်ကောင်းဆန်တဲ့သူတွေများလေ လူ့လောကမှာ အခက်အခဲတွေ မမျှတမှုတွေများလေ ဖြစ်မယ်။ ခွင့်လွှတ်နိုင်တဲ့စိတ်ဟာ မြင့်မြတ်တဲ့စိတ်ဖြစ်တယ်။ ရင့်ကျက်တဲ့ ခိုင်မာတဲ့စိတ်ဖြစ်တယ်။ သဘောထားကြီးတဲ့စိတ် (Big Mind) ဖြစ်တယ်။ အင်အားကြီးတဲ့စိတ် (Powerful Mind) ဖြစ်တယ်။