ကလေးကဗျာများကို လူကြီးစာဆိုများသာမက ကလေးငယ်များကလည်း ရေးဖွဲ့ခဲ့ကြသည်။ ယနေ့ခေတ်အချိန်အခါတွင် ကလေးများအတွက် ထုတ်ဝေသည့် စာနယ်ဇင်းများ၌ ကလေးများရေးဖွဲ့သည့် ကလေးကဗျာများကို ထည့်သွင်းဖော်ပြလာခြင်း၊ ကလေးကဗျာပြိုင်ပွဲများ ပြုလုပ်ပေးခြင်း စသည်ဖြင့် ပြုလုပ်လာခြင်းသည် ကလေးငယ်များ ကဗျာကို စိတ်ဝင်စား၍ စာပေကို မြတ်နိုးတန်ဖိုးထားတတ်စေလိုသော ရည်ရွယ်ချက်များကြောင့် ဖြစ်သည်ဟု ဆိုရပေမည်။ မြန်မာစာပေတွင် ခိုင်ခိုင်မာမာပေါ်ထွန်း ရပ်တည်လာနိုင်ခဲ့သည့် မြန်မာကလေးကဗျာများ၏ (သမိုင်းကြောင်း)ကို မြန်မာစာပေသမိုင်း၏ တစ်စိတ်တစ်ဒေသအဖြစ် လေ့လာနိုင်ရန် ဤစာအုပ်ကို ရည်ရွယ်ရေးဖွဲ့ရခြင်းဖြစ်သည်။